CAPUT VIII. De sagittis. SHOW APPARATUS
| 1 | Sagitta a sagaci iactu, id est, veloci ictu vocata. Pennis enim fertur, quasi avis, ut celeriter mors percurrat ad hominem. His primum Cretenses usi sunt, quibus pennae (ut diximus) ideo agglutinantur, ut leves sint et pervolent Scaptos . . . . Spicula sunt sagittae vel lanceae breves a spicarum specie nuncupatae. Scorpio est sagitta venenata, arcu vel tor mentis excussa, quae dum ad hominem venerit, virus, quo figit, infundit: unde et scorpio nomen accepit. De sagittis ergo in Iob ita scriptum est: Sagittae Domini in me sunt, quarum indignatio ebibit spiritum meum. Hic sagittarum nomine animadversionis sententia designatur. |
| 2 | Vir igitur sanctus quia peregrinationis suae aerumnam respicit, quod sub persecutionibus Dominicae animadversionis ingemiscat, dicit: Unde et verba mea dolore sunt plena: quia sagittae in me sunt Domini: ac si diceret: Ego in exsilii damnatione non gaudeo: sed sub iudicio positus doleo, quia vim persecutionis agnosco. |
| 3 | Sagitta, Dominus Iesus Christus, corda electorum suorum salubriter vulnerans, ut in Isaia: Sicut sagittam, abscondit me in pharetra sua. Sagitta praeceptum divinum, ut in Psalterio: Sagittae parvulorum factae sunt plagae eorum, hoc est, apostolorum. Et alibi: Misit sagittas suas, dissipavit eos. Sagittae insidiae inimici, sive sermo haereticorum, ut in Ieremia: Sagitta vulnerans, lingua inimici. Aliquando vero sagittarum nomine, ut diximus, sententiae divinae legis exprimuntur; unde est illud in psalmo: Sagittae tuae acutae, potentissime; et alibi sagittae acutae sunt verba Domini Salvatoris hominum, sagittae potentis acutae, corda salubriter infigentia, quae ideo vulnerant, ut sanent: ideo percutiunt, ut liberent: ideo prosternunt, ut erigant. |
| 4 | Nam et aliam significationem sagittae habent in illa psalmi sententia: Paraverunt sagittas suas in pharetra, ut sagittent in obscuro rectos corde. Permanet in comparatione sagittarii: nam sicut iste habet sagittas in pharetra, ita ille gestat in corde verba venenosa: in obscuro vero, sive cum persecutionibus perturbatur Ecclesia, quando timore periculi carnales homines creduntur facilius immutari: sive in abscondito consilio, cum opportunius putant Christianos decipere, quando eos iudicant sua consilia non videre: sed cum dicit, rectos corde, insidias eorum ostendit inanes et vacuas. |